جربت طرق كتير للقرص وكل مرة ليها عيب مش عاجبني لحد ما توصلت للطريقة دي جربتها وعجبت جوزي والولاد جدا من غير تطويل
المقادير:
==========
1 كيلو دقيق
1/2 كيلو لبن
باكو خميرة
باكو بيكنج باودر
1/2 كوباية سمن (زبدة او زيت )
رشة صغيرة ملح
2 ملعقة كبيرة سكر
2 بيضة
طريقة التحضير
=============
نخلط الخميرة مع حبة سكر ومية او لبن دافيين ونسيبها 10 دقايق تتخمر
نخلط السكر مع اللبن لحد ما يدوب ويستحسن يكون اللبن دافيء وبعدين نخلطهم مع الدقيق ونضيف البيض والسمن والخميرة وباقي المقادير ونفضل نعجن فيهم لحد ما تكون عجينة حلوة متماسكة مبتلزقش في الايد ولو لقيتي لسة العجينة بتلزق معاكي ضيفي دقيق حبة حبة حسب ما تحتاج معاكي
وبعد كدة سبيها في مكان دافي تخمر لو الجو برد املي حله مية واغليها ودخليها الفرن وهو مطفي جنب العجينة كدة هتحفظلك الفرن دافي لحد ما العجينة تخمر
وبعد كدة افرديها عوشكليها حسب ما تحبي وممكن تحشيها انا عملت منها قرص وحطيت فيها جبنة وزيتون وكانت تحفة واو زادت معاكي العجينة شيليها في الفريزر وطلعي منها وقت ماتحتاجي واعمليه بيتزا بتطلع تحفة بس رققي العجينة كويس لانها بتعلي وترفع في الفرن ونصيحة لو هتعمليها بيتزا او حتي اي عجينة تانية دخلي العجينة بعد فردها الفرن تاخد نص سوي وبعد كدة حطي الصلصة وباقي الاضافات
اهم حاجة انك تسويه في فرن مش عالي اوي في الحرارة عشان تستوي وتديكي لون حلو انا بسويها علي 200 درجة وكمان نصيحة لما تيجي تاكليها سخنيها في الفرن الاول بتبقي كانها لسة معمولة
اشوفكم الوصفة الجاية
تحياتي
ليست هناك تعليقات:
إرسال تعليق